ຝຶກອົບຮົມເຕັກນິກການສ້າງນິຕິກຳ ໃຫ້ບັນດາພະແນກ ປທສ 05 ແຂວງພາກໃຕ້

Tags: , , ,

ໃນລະຫວ່າງວັນທີ 15-17 ກໍລະກົດ 2020 ທີ່ຜ່ານ​ມາ, ສູນສົ່ງເສີມການນຳໃຊ້ເຕັກໂນໂລຊີການສື່ສານຂໍ້ມູນຂ່າວສານ ໄດ້ເປີດຊຸດຝຶກອົບຮົມໃນຫົວຂໍ້: “ເຕັກນິກການສ້າງນິຕິກຳ ໃຫ້ບັນດາພະແນກ ປທສ 05 ແຂວງພາກໃຕ້” ການຝຶກອົບຮົມດັ່ງກ່າວໄດ້ຈັດຂຶ້ນທີ່ ສະຖາບັນເຕັກໂນໂລຊີຂໍ້ມູນຂ່າວສານ, ກະຊວງ ໄປສະນີ ໂທລະຄົມມະນາຄົມ ແລະ ການສື່ສານ ພາຍໃຕ້ການເປັນປະທານຂອງ ທ່ານ ສຸລິຍາ ຄຳບູຣາວົງ ຫົວໜ້າສູນສົ່ງເສີມການນຳໃຊ້ເຕັກໂນໂລຊີການສື່ສານຂໍ້ມູນຂ່າວສານ.

ການຝຶກອົບຮົມໃນຄັ້ງນີ້ ມີຜູ້ເຂົ້າຮ່ວມທັງໝົດ 25 ທ່ານ ຊຶ່ງປະກອບມີບັນດາຫົວໜ້າພະແນກ, ຮອງພະແນກ, ຫົວໜ້າຂະແໜງ, ຮອງຂະແໜງ ພ້ອມດ້ວຍພະນັກງານວິຊາການ ຈາກ ພະແນກ ປທສ 05 ແຂວງພາກໃຕ້ (ສະຫວັນນະເຂດ, ເຊກອງ, ສາລະວັນ,  ຈຳປາສັກ ແລະ ອັດຕະປື) ເຂົ້າຮ່ວມ ແລະ ໃຫ້ກຽດເປັນວິທະຍາກອນທີ່ມີຄວາມຮູ້ຄວາມສາມາດຈາກກະຊວງຍຸຕິທຳ 02 ທ່ານ.

ການເປີດຊຸດຝຶກອົບຮົມໃນຄັ້ງນີ້ ມີຈຸດປະສົງເພື່ອ ເປັນການສ້າງຂະບວນການເພື່ອຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ II ຂອງອົງຄະນະພັກກະຊວງ ປທສ ທີ່ຈະໄຂຂຶ້ນໃນມໍ່ໆນີ້ ແລະ ເພື່ອຍົກລະດັບໃຫ້ພະນັກງານ-ລັດຖະກອນຂອງພະແນກ ປທສ 05 ແຂວງພາກໃຕ້ ໄດ້ມີຄວາມຮັບຮູ້ ຄວາມເຂົ້າໃຈ ກ່ຽວກັບ ວຽກງານການສ້ງນິຕິກຳ ໂດຍສະເພາະແມ່ນການສ້າງນິຕິກຳຢູ່ຂັ້ນທ້ອງຖິ່ນ ເປັນການພັດທະນາຊັບພະຍາກອນມະນຸດ ແນໃສ່ສ້າງຄວາມເຂັ້ມແຂງທາງດ້ານວິຊາການກ່ຽວກັບວຽກງານການສ້າງນິຕິກຳໃຫ້ພະນັກງານ-ລັດຖະກອນ ຂອງຂະແໜງການ ປທສ ຂັ້ນທ້ອງຖິ່ນ,

ການຝຶກອົບຮົມ ໄດ້ດຳເນີນເປັນເວລາ 03 ວັນ  ຊຶ່ງບັນດາຜູ້ເຂົ້າຮ່ວມຝຶກອົບຮົມໄດ້ຮັບຟັງ ການນໍາສະເໜີບົດຮຽນຈາກນັກວິທະຍາກອນທີ່ມາຈາກ ກະຊວງ ຍຸຕິທໍາ ກ່ຽວກັບ ປະເພດ-ລະບົບນິຕິກໍາ ຂອງ ສປປ ລາວ, ຂະບວນ-ຂັ້ນຕອນການສ້າງນິຕິກໍາ, ເຕັກນິກການສ້າງນິຕິກໍາ, ສ້າງນິຕິກໍາໃຕ້ກົດໝາຍ, ການສ້າງຂໍ້ຕົກລົງ, ຄຳສັ່ງ, ຄຳແນະນຳຂັ້ນແຂວງ, ວຽກງານປະເມີນຜົນກະທົບຕໍ່ຮ່າງນິຕິກຳ ແລະ ວຽກງານຈົດໝາຍເຫດທາງລັດຖະການ ເພື່ອແນ່ໃສ່ພັດທະນາຊັບພະຍາກອນມະນຸດ ແລະ ການສ້າງຄວາມເຂັ້ມແຂງທາງດ້ານວິຊາການ ກ່ຽວກັບວຽກງານການສ້າງນິຕິກໍາໃຫ້ກັບຂະແໜງການ ປທສ ຂັ້ນທ້ອງຖິ່ນ.

ໃນຕອນທ້າຍ ທ່ານປະທານ ໄດ້ໂອ້ລົມຕໍ່ນັກສຳມະນາກອນ ຊຶ່ງທ່ານໄດ້ກ່າວວ່າ ຈົ່ງນຳເອົາບັນດາຄວາມຮູ້ ແລະ ປະສົບການຈາກການຝຶກອົບຮົມຄັ້ງນີ້ນຳໄປຈັດຕັ້ງປະຕິບັດໃຫ້ຖືກຕ້ອງ ແລະ ສອດຄ່ອງ ຕາມພາລະບົດບາດ, ສິດ ແລະ ໜ້າທີ່ ຕາມຄວາມຮັບຜິດຊອບຂອງຕົນ ເປັນເຈົ້າການພ້ອມກັນຈັດຕັ້ງປະຕິບັດວຽກງານນິຕິກຳ ຂະແໜງ ການໄປສະນີ, ໂທລະຄົມມະນາຄົມ ແລະ ການສື່ສານ ໃຫ້ໄດ້ຮັບປະສິດທິພາບ ແລະ ປະສິດທິຜົນສູງສຸດ.

Cadit: Webmaster.

ຄົ້ນຫາ

ລາຍການອັບເດດປັດຈຸບັນ