ຝຶກອົບຮົມເຕັກນິກການສ້າງນິຕິກຳ ໃຫ້ບັນດາພະແນກ ປທສ 8 ແຂວງພາກເໜືອ

Creating laws training

ໃນລະຫວ່າງວັນທີ 25-26 ເມສາ 2018 ທີ່ຜ່ານ​ມາ, ສູນສົ່ງເສີມການນຳໃຊ້ເຕັກໂນໂລຊີການສື່ສານຂໍ້ມູນຂ່າວສານໄດ້ເປີດຊຸດຝຶກອົບຮົມໃນຫົວຂໍ້:‘’ເຕັກນິກການສ້າງນິຕິກຳ ໃຫ້ບັນດາພະແນກ ປທສ 8 ແຂວງພາກເໜືອ‘’ໃຫ້ແກ່ພະນັກງານ-ລັດຖະກອນ ພະແນກ ປທສ 8 ແຂວງ ພາກເໜືອ, ການຝຶກອົບຮົມດັ່ງກ່າວໄດ້ຈັດຂຶ້ນທີ່ ພະແນກ ປທສ ແຂວງອຸດົມໄຊພາຍໃຕ້ການເປັນປະທານຂອງ ທ່ານ ສຸລິຍາ ຄຳບູຣາວົງ ຫົວໜ້າສູນສົ່ງເສີມ. 

ການຝຶກອົບຮົມໃນຄັ້ງນີ້ ມີຜູ້ເຂົ້າຮ່ວມທັງໝົດ 38 ທ່ານ ຊຶ່ງປະກອບມີບັນດາຫົວໜ້າພະແນກ, ຮອງພະແນກ ພ້ອມດ້ວຍພະນັກງານວິຊາການ ຈາກ ພະແນກ ປທສ 8 ແຂວງພາກເໜືອ (ອຸດົມໄຊ, ຜົ້ງສາລີ, ຫຼວງນຳ້ທາ, ບໍ່ແກ້ວ, ຫົວພັນ, ຊຽງຂວາງ, ຫຼວງພະບາງ ແລະ ໄຊຍະບູລີ) ເຂົ້າຮ່ວມ ແລະ ໃຫ້ກຽດເປັນວິທະຍາກອນທີ່ມີຄວາມຮູ້ຄວາມສາມາດຈາກກະຊວງຍຸຕິທຳ 2 ທ່ານ.

ການເປີດຊຸດຝຶກອົບຮົມໃນຄັ້ງນີ້ ມີຈຸດປະສົງເພື່ອຈັດຕັ້ງປະຕິບັດຕາມໂຄງການສ້າງຄວາມເຂັ້ມແຂງທາງດ້ານວິຊາການກ່ຽວກັບວຽກງານການສ້າງນິຕິກຳຂອງຂະແໜງການ ປທສ ໃນຂອບເຂດທົ່ວປະເທດ ແລະ ຕາມການຊີ້ນໍາຂອງຄະນະພັກ-ຄະນະນຳ ກະຊວງ ເພື່ອຍົກລະດັບຄວາມຮູ້ຄວາມສາມາດໃຫ້ແກ່ພະນັກງານ-ລັດຖະກອນໃນຂະແໜງ ປທສ ກ່ຽວກັບວຽກງານການສ້າງນິຕິກຳ ໃຫ້ມີຄຸນນະພາບ ແລະ ຖືກຕ້ອງຕາມຫຼັກການ. 

ການຝຶກອົບຮົມ ໄດ້ດຳເນີນເປັນເວລາ 02 ວັນ  ຊຶ່ງບັນດາຜູ້ເຂົ້າຮ່ວມຝຶກອົບຮົມໄດ້ຮັບຟັງ ການນໍາສະເໜີບົດຮຽນຈາກນັກວິທະຍາກອນທີ່ມາຈາກ ກະຊວງ ຍຸຕິທໍາ ກ່ຽວກັບ ປະເພດ-ລະບົບນິຕິກໍາ ຂອງ ສປປ ລາວ, ຂະບວນ-ຂັ້ນຕອນການສ້າງນິຕິກໍາ, ເຕັກນິກການສ້າງນິຕິກໍາ, ສ້າງນິຕິກໍາໃຕ້ກົດໝາຍ, ການສ້າງຂໍ້ຕົກລົງ, ຄຳສັ່ງ, ຄຳແນະນຳຂັ້ນແຂວງ, ວຽກງານປະເມີນຜົນກະທົບຕໍ່ຮ່າງນິຕິກຳ ແລະ ວຽກງານຈົດໝາຍເຫດທາງລັດຖະການ ເພື່ອແນ່ໃສ່ພັດທະນາຊັບພະຍາກອນມະນຸດ ແລະ ການສ້າງຄວາມເຂັ້ມແຂງທາງດ້ານວິຊາການ ກ່ຽວກັບວຽກງານການສ້າງນິຕິກຳໃຫ້ກັບຂະແໜງການ ປທສ ຂັ້ນທ້ອງຖິ່ນ.

            ໃນຕອນທ້າຍ ທ່ານປະທານ ໄດ້ໂອ້ລົມຕໍ່ນັກສຳມະນາກອນ ຊຶ່ງທ່ານໄດ້ກ່າວວ່າ ຈົ່ງນຳເອົາບັນດາຄວາມຮູ້ ແລະ ປະສົບການຈາກການຝຶກອົບຮົມຄັ້ງນີ້ນຳໄປຈັດຕັ້ງປະຕິບັດໃຫ້ຖືກຕ້ອງ ແລະ ສອດຄ່ອງ ຕາມພາລະບົດບາດ, ສິດ ແລະ ໜ້າທີ່ ຕາມຄວາມຮັບຜິດຊອບຂອງຕົນ ເປັນເຈົ້າການພ້ອມກັນຈັດຕັ້ງປະຕິບັດວຽກງານນິຕິກຳ ຂະແໜງ ການໄປສະນີ, ໂທລະຄົມມະນາຄົມ ແລະ ການສື່ສານ ໃຫ້ໄດ້ຮັບປະສິດທິພາບ ແລະ ປະສິດທິຜົນສູງສຸດ.

ຂ່າວ-ພາບ: ສູນສົ່ງເສີມການນຳໃຊ້ເຕັກໂນໂລຊີການສື່ສານຂໍ້ມູນຂ່າວສານ, ກະຊວງ ປທສ.

ຄົ້ນຫາ

ລາຍການອັບເດດປັດຈຸບັນ