ເປີດກອງປະຊຸມປະເມີນຂໍ້ແຂ່ງຂັນ 4 ບຸກ ຂອງໜ່ວຍຮາກຖານຊາວໜຸ່ມ ສສຕ

ປະເມີນ 4 ບຸກ

ໃນຕອນບ່າຍ ຂອງວັນທີ 06 ກໍລະກົດ 2020 ເວລາ 13:30 ໂມງ ໜ່ວຍຮາກຖານຊາວໜູ່ມສູນສົ່ງເສີມການນຳໃຊ້ເຕັກໂນໂລຊີການສື່ສານຂໍ້ມູນຂ່າວສານ ໄດ້ເປີດກອງປະຊຸມ ທີ່ຫ້ອງປະຊຸມຫົວໜ້າສູນ ພາຍໃຕ້ການເປັນປະທານ ຂອງສະຫາຍ ສຸລິຍາ ຄໍາບູຣາວົງ ເລຂາໜ່ວຍພັກສູນສົ່ງເສີມການນໍາໃຊ້ເຕັກໂນໂລຊີການສື່ສານຂໍ້ມູນຂ່າວສານ,  ເຊີ່ງມີສະມາຊິກຊາວໜຸ່ມເຂົ້າຮ່ວມທັງໝົດ 14 ສະຫາຍ, ຂາດ 01 ສະຫາຍ (ລາພັກເພື່ອປີ່ນປົວສຸຂະພາບ).  ຈຸດປະສົງ ເພື່ອປະເມີນການຈັດຕັ້ງປະຕິບັດ ຂໍ້ເເຂ່ງຂັນ 04 ບຸກ ປະຈໍາປີ 2019 ໃຫ້ກັບ ສະມາຊິກຊາວໜຸ່ມພາຍໃນໜ່ວຍ. ເຊີ່ງໃນກອງປະຊຸມດັ່ງກ່າວ ໄດ້ມີການຜ່ານໃບເກັບກ່ຽວຜົນງານຂອງແຕ່ລະສະຫາຍ ແລະ ໄດ້ມີການປະເມີນຄະແນນໃນສອງແບບຄື: ການໃຫ້ຄະແນນຕົນເອງ ແລະ ໝູ່ຄະນະໃຫ້ຄະແນນ. ກ່ອນການປິດກອງປະຊຸມ ສະຫາຍ ເລຂາໜ່ວຍພັກໄດ້ມີການໃຫ້ຄຳເຫັນ ຕໍ່ສະມາຊິກທຸກສະຫາຍ ເພື່ອນຳໄປຜັນຂະຫຍາຍເຂົ້າໃນການຈັດຕັ້ງ ແລະ ປະຕີບັດວຽກງານຂອງຕົນດັ່ງນີ້:

  1. ໃຫ້ເອົາໃຈ ເຄື່ອນໄຫວຈັດຕັ້ງປະຕິບັດ, ຜັນຂະຫຍາຍ ຂະບວນການຂໍ້ແຂ່ງຂັນ 04 ບຸກ ຂອງຊາວໜຸ່ມ ທີ່ວາງອອກ ເພື່ອສ້າງໃຫ້ຄະນະພ້ອມດ້ວຍ ສະມາຊິກທຸກສະຫາຍ ພາຍໃນໜ່ວຍຂອງຕົນ ໃຫ້ໄດ້ຮັບນາມມະຍົດ 04 ບຸກ ຕາມຄຳຂັວນ ຄື: ບຸກດ້ານແນວຄິດ, ດ້ານການສຶກສາຮ່ຳຮຽນ, ດ້ານການຈັດຕັ້ງ ແລະ ດ້ານການສ້າງວຽກງເຮັດງານທຳ;
  2. ສຶບຕໍ່ປະສານ ສົມທົບ ກັບ ບັນດາໜ່ວຍຊາວໜຸ່ມ ຫຼື ຮາກຖານຊາວໜຸ່ມ ທັງພາຍໃນ ແລະ ອ້ອມຂ້າງກະຊວງ ໃນແຕ່ລະໄລຍະ ເພື່ອປຶກສາຫາລື, ແລກປ່ຽນ ແລະ ຖອດບົດຮຽນ ເຊີ່ງກັນ ແລະ ກັນ ໃຫ້ມີຄວາມຕໍ່ເນື່ອງ ພ້ອມດຽວກັນນີ້ກໍ່ໃຫ້ເອົາໃຈໃສ່ພົວພັນ, ຮ່ວມມືກັບອົງການຈັດຕັ້ງພາຄີ, ການຈັດຕັ້ງມະຫາຊົນອື່ນ, ນັບທັງຕ່າງປະເທດ ແລະ ອົງການຈັດຕັ້ງສາກົນ ເພື່ອຍາດແຍ່ງຄໍາຄິດຄໍາເຫັນ, ບົດຮຽນ, ປະສົບການໃນວຽກງານ, ຍາດແຍ່ງການຊ່ວຍເຫຼືອດ້ານທຶນຮອນເພື່ອມາພັດທະນາຊາວໜຸ່ມ ກໍ່ຄື ວຽກງານວິຊາສະເພາະ ໃຫ້ເປັນຮູບປະທໍາ;
  3. ສືບຕໍ່ປັບປຸງການຈັດຕັ້ງຊາວໜຸ່ມໃຫ້ເຕີບໃຫຍ່, ເຂັ້ມແຂງດ້ານການຈັດຕັ້ງ ແລະ ແບບແຜນວິທີເຮັດວຽກທີ່ດີ ມີການແບ່ງງານ, ແບ່ງຄວາມຮັບຜິດຊອບໃຫ້ກັນຈະແຈ້ງ, ຈັດຕັ້ງປະຕິບັດໃຫ້ມີຜົນສໍາເລັດທີ່ດີ, ພ້ອມນັ້ນກໍ່ຊຸກຍູ້ກວດກາຕີລາຄາ ແລະ ສະຫຼຸບຖອດຖອນບົດຮຽນແຕ່ລະໄລຍະ;
  4. ສືບຕໍ່ຈັດຕັ້ງ ຜັນຂະຫຍາຍ ຝືກຝົນຫຼໍ່ຫຼອມ ຕົນເອງໃຫ້ມີຄວາມຮູ້ ຄວາມສາມາດ, ຕອບສະໜອງ ໄດ້ກັບຄວາມຮຽກຮ້ອງຕ້ອງການ ຂອງໜ້າທີ່ວຽກງານ ແນ່ໃສ່ສ້າງ ຊາວໜຸ່ມ ທົ່ວຮາກຖານ ມີຄວາມສາມັກຄີ ຢ່າງໜັກແໜ້ນມີນໍ້າໃຈເສຍສະຫຼະ ເພື່ອເປັນ ກຳລັງແຮງ ແລະ ເປັນຜູ້ສືບທອດ ທີ່ດີຂອງພັກ ໄປພ້ອມໆ ກັບການຈັດຕັ້ງ ຜັນຂະຫຍາຍ ຂໍ້ແຂ່ງຂັນ 04 ບຸກ ໃຫ້ບັນລຸຄາດໝາຍ ແລະ ສາມາດຮັກສາມູນເຊື້ອ ໃນປີຕໍ່ໆໄປ.

ຂໍ້ມູນ ແລະ ຮູບພາບໂດຍ: Webmaster

ຄົ້ນຫາ

ລາຍການອັບເດດປັດຈຸບັນ