ເຜີຍແຜ່ຜົນປະໂຫຍດການນຳໃຊ້ ໄອຊີທີ ແລະ ນິຕິກຳ ກ່ຽວກັບການນຳໃຊ້ສື່ສັງຄົມອອນລາຍ

Tags:

workshop

       ໃນຕອນເຊົ້າ ຂອງວັນທີ 21 ກຸມພານີ້, ສູນສົ່ງເສີມການນຳໃຊ້ເຕັກໂນໂລຊີການສື່ສານຂໍ້ມູນຂ່າວສານ ຮ່ວມກັບ ສູນສະກັດກັ້ນ ແລະ ແກ້ໄຂເຫດສຸກເສີນທາງຄອມພິວເຕີ, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ໄດ້ຈັດສຳມະນາເຜີຍແຜ່ຄວາມຮູ້ໃນຫົວຂໍ້: ຜົນປະໂຫຍດການນຳໃຊ້ ໄອຊີທີ ໃນຊີວິດປະຈຳວັນ ແລະ ນິຕິກຳ ກ່ຽວກັບການນຳໃຊ້ສື່ສັງຄົມອອນລາຍ ໃຫ້ແກ່ພະນັກງານ ແລະ ນັກສຶກສາ ທີ່ສະຖາບັນເສດຖະກິດການເງິນ ເພື່ອສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ II ຂອງອົງຄະນະພັກ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ. ໃຫ້ກຽດກ່າວເປີດພິທີໂດຍ ທ່ານ ສຸລິຍາ ຄຳບູຣາວົງ ຫົວໜ້າສູນ​ສົ່ງ​ເສີມ​ການ​ນຳ​ໃຊ້​ເຕັກ​ໂນ​ໂລ​ຊີ​ການ​ສື່ສານ​ຂໍ້​ມູນ​ຂ່າວສານ, ກະຊວງ ປທສ. ເຊິ່ງເຜີຍແຜ່ເອກະສານໂດຍ ດຣ ພັນປະກິດ ອ່ອນພັນດາລາ ຮອງຫົວໜ້າສູນຄົ້ນຄວ້ານະໂຍບາຍພັດທະນາວິສາຫະກິດ ແລະ ການເຊື່ອມໂຍງສາກົນ, ສະຖາບັນຄົ້ນຄວ້າເສດຖະກິດແຫ່ງຊາດ ແລະ  ທ່ານ ທຽນໄຊ ບໍລິບຸນ ຫົວໜ້າພະແນກເຕັກນິກຄວາມປອດໄພ, ສູນສະກັດກັ້ນ ແລະ ແກ້ໄຂເຫດສຸກເສີນທາງຄອມພິວເຕີ, ກະຊວງ ປທສ ມີພະນັກງານຄູອາຈານ ແລະ ນັກສຶກສາ ໃນສະຖາບັນເສດຖະກິດການເງີນເຂົ້າຮ່ວມ.

 ທ່ານ ສຸລິຍາ ຄໍາບູຣາວົງ ໄດ້ມີຄຳເຫັນ ດັ່ງນີ້: ການນຳໃຊ້ມືຖື ແລະ ສື່ສັງຄົມອອນລາຍ ໃນປັດຈຸບັນໄດ້ກາຍເປັນໜຶ່ງປັດໃຈສຳຄັນ ໃນຊີວິດປະຈຳວັນ ແລະ ຫຼາຍຄົນກໍ່ຂາດການນຳໃຊ້ບໍ່ໄດ້ ໂດຍສະເພາະການນຳໃຊ້ເຂົ້າໃນວຽກງານ, ການເຮັດທຸລະກິດ ຫຼື ການສຶກສາ-ຮ່ຳຮຽນ ຄຽງຄູ່ກັນນັ້ນ ສື່ສັງຄົມອອນລາຍກໍມີຄວາມສ່ຽງ ແລະ ສາມາດສ້າງຜົນເສຍຫາຍໃຫ້ແກ່ຜູ້ໃຊ້ໄດ້ຫຼາຍເຊັ່ນກັນ ຖ້າຜູ້ໃຊ້ບໍ່ຮູ້ວິທີການນໍາໃຊ້ທີ່ຖືກຕ້ອງ, ຮູ້ເທົ່າບໍ່ເຖິງການ ຫຼື ຂາດວິຈາລະນາຍານໃນການນໍາໃຊ້ ກໍອາດຈະສົ່ງຜົນກະທົບດ້ານລົບ ຫຼື ອາດຖືກຫຼອກລວງໄດ້. ສະນັ້ນ, ສູນ​ສົ່ງ​ເສີມ​ການ​ນຳ​ໃຊ້​ເຕັກ​ໂນ​ໂລ​ຊີ​ການ​ສື່ສານ​ຂໍ້​ມູນ​ຂ່າວສານ, ກະຊວງ ປທສ ເຫັນໄດ້ເຖິງຄວາມສຳຄັນ ແລະ ບັນຫາດັ່ງກ່າວ ຈຶ່ງໄດ້ຈັດສຳມະນາໃນຄັ້ງນີ້ຂຶ້ນ  ເພື່ອເຜີຍແຜ່ນິຕິກຳ ແລະ ຄວາມຮູ້, ຄວາມເຂົ້າໃຈ ໃຫ້ແກ່ພະນັກງານ ນັກຮຽນ-ນັກສຶກສາ ກ່ຽວກັບການນໍາໃຊ້ ສື່ສັງຄົມອອນລາຍທີ່ຖືກຕ້ອງ, ສ້າງຈິດສໍານຶກທີ່ດີໃນການນໍາໃຊ້ ແລະ ລະບຽບກົດໝາຍ ກ່ຽວກັບການນຳໃຊ້ ສື່ສັງຄົມອອນລາຍ.

 

 

ບົດຄວາມ ແລະ ຮູບພາບໂດຍ: webmaster

ຄົ້ນຫາ

ລາຍການອັບເດດປັດຈຸບັນ