ກະຊວງ ປທສ ຝຶກອົບຮົມເຕັກນິກການສ້າງນິຕິກຳໃຫ້ບັນດາກົມ/ທຽບເທົ່າອ້ອມຂ້າງ ກະຊວງ ປທສ ຄັ້ງທີ I

ໃນລະຫວ່າງວັນທີ 19-21 ທັນວາ 2018 ຜ່ານ​ມາ, ກະຊວງໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ເປີດຊຸດຝຶກອົບຮົມໃນຫົວຂໍ້: ‘’ ເຕັກນິກການສ້າງນິຕິກຳ ກະຊວງ ປທສ ຄັ້ງທີ I ‘’ ໃຫ້ພະນັກງານ-ລັດຖະກອນທີ່ຮັບຜິດຊອບວຽກງານນິຕິກຳຂອງບັນດາກົມ/ທຽບເທົ່າພາຍໃນກະຊວງ ປທສ ຈໍານວນ 14 ພາກສ່ວນ, ການຝຶກອົບຮົມດັ່ງກ່າວໄດ້ຈັດຂຶ້ນຢູ່ ທ່າລາດ, ເມືອງ ແກ້ວອຸດົມ, ແຂວງວຽງຈັນ ຈັດໂດຍ ສູນສົ່ງເສີມການນຳໃຊ້ເຕັກໂນໂລຊີການສື່ສານຂໍ້ມູນຂ່າວສານ ພາຍໃຕ້ການເປັນປະທານຂອງ ທ່ານ ສຸລິຍາ ຄຳບູຣາວົງ ຫົວໜ້າສູນສ່ົງເສີມ, ການຝຶກອົບຮົມໃນຄັ້ງນີ້ມີຜູ້ເຂົ້າຮ່ວມທັງໝົດ 50 ທ່ານ ຊຶ່ງປະກອບມີບັນດາຫົວໜ້າກົມ, ຮອງກົມ/ທຽບເທົ່າ, ຫົວໜ້າພະແນກ, ຮອງພະແນກ ພ້ອມດ້ວຍພະນັກງານວິຊາການ ເຂົ້າຮ່ວມ ແລະ ໃຫ້ກຽດເປັນວິທະຍາກອນ ໂດຍ ທ່ານ ສຸລິຍາ ສີດາວົງ ຮອງຫົວໜ້າກົມກົດໝາຍ, ກະຊວງຍຸຕິທຳ ພ້ອມດ້ວຍຄະນະ 2 ທ່ານ.

ການເປີດຊຸດຝຶກອົບຮົມໃນຄັ້ງນີ້ມີຈຸດປະສົງ ເພື່ອຈັດຕັ້ງປະຕິບັດຕາມໂຄງການສ້າງຄວາມເຂັ້ມແຂງທາງດ້ານວິຊາການກ່ຽວກັບວຽກງານການສ້າງນິຕິກຳຂອງຂະແໜງການ ປທສ ໃນຂອບເຂດທົ່ວປະເທດ  ແລະ ຕາມການຊີ້ນໍາຂອງຄະນະພັກ-ຄະນະນຳ ກະຊວງ ເພື່ອຍົກລະດັບຄວາມຮູ້ຄວາມສາມາດກ່ຽວກັບການສ້າງນິຕິກຳ ໃຫ້ແກ່ພະນັກງານ-ລັດຖະກອນຂອງບັນດາກົມ/ທຽບເທົ່າ ພາຍໃນ ກະຊວງ ປທສ ແນໃສ່ຍົກສູງການສ້າງນິຕິກຳ ໃຫ້ມີຄຸນນະພາບ ແລະ ຖືກຕ້ອງຕາມຫຼັກການ.

ໃນການຝຶກອົບຮົມຄັ້ງນີ້  ບັນດາຜູ້ເຂົ້າຮ່ວມຝຶກອົບຮົມ ໄດ້ຮັບຟັງ ການນໍາສະເໜີບົດຮຽນຈາກວິທະຍາ ກອນ  ຊຶ່ງເປັນຜູ້ທີ່ມີຄວາມຮູ້ ຄວາມສາມາດ ແລະ ປະສົບການກ່ຽວກັບວຽກງານນິຕິກຳ ຊຶ່ງຕະຫຼອດໄລຍະເວລາ 3 ວັນຂອງການຝຶກອົບຮົມ ແມ່ນເຕັມໄປດ້ວຍບັນຍາກາດອັນຟົດຟື້ນ ແລະ ດ້ວຍຄວາມຮັບຜິດຊອບສູງຂອງຜູ້ເຂົ້າຮ່ວມຝຶກອົບຮົມ ເຮັດໃຫ້ການຝຶກອົມຮົມປະສົບຜົນສຳເລັດຕາມລະດັບຄາດໝາຍ ຊ່ວຍໃຫ້ພະນັກງານ-ລັດຖະ ກອນທີ່ຮັບຜິດຊອບວຽກງານນິຕິກໍາຂອງ ກະຊວງ ປທສ ໄດ້ຮັບຮູ້ ແລະ ເຂົ້າໃຈເຕັກນິກພື້ນຖານວຽກງານນິຕິກຳ ເປັນຕົ້ນ: ປະເພດ ແລະ ລະບົບນິຕິກຳ, ການສ້າງກົດໝາຍ, ການສ້າງນິຕິກຳໃຕ້ກົດໝາຍ, ເຕັກນິກການສ້າງນິຕິກໍາ ແລະ ວຽກງານປະເມີນຜົນກະທົບຕໍ່ຮ່າງນິຕິກໍາ.

ໃນຕອນທ້າຍ ທ່ານປະທານ ໄດ້ໃຫ້ໂອ້ລົມຕໍ່ຊຸດຝຶກອົບຮົມ ຊຶ່ງທ່ານໄດ້ກ່າວວ່າ ໃຫ້ນັກສໍາມະນາກອນທຸກທ່ານ ຈົ່ງນຳເອົາບັນດາຄວາມຮູ້ ແລະ ປະສົບການຈາກການຝຶກອົບຮົມຄັ້ງນີ້ນຳໄປຈັດຕັ້ງປະຕິບັດໃຫ້ຖືກຕ້ອງ ແລະ ສອດຄ່ອງ ຕາມພາລະບົດບາດ, ສິດ ແລະ ໜ້າທີ່ ຕາມຄວາມຮັບຜິດຊອບຂອງຕົນ ເປັນເຈົ້າການພ້ອມກັນຈັດຕັ້ງປະຕິບັດວຽກງານນິຕິກຳ ຂະແໜງການໄປສະນີ ໂທລະຄົມມະນາຄົມ ແລະ ການສື່ສານ ໃຫ້ໄດ້ຮັບປະສິດທິພາບ ແລະ ປະສິດທິຜົນສູງສຸດ.

 

ຂ່າວ-ພາບ: ສູນສົ່ງເສີມການນຳໃຊ້ເຕັກໂນໂລຊີການສື່ສານຂໍ້ມູນຂ່າວສານ, ກະຊວງ ປທສ

451 comments

Leave a Reply

Your email address will not be published.

ຄົ້ນຫາ

ລາຍການອັບເດດປັດຈຸບັນ